பேராதனை பல்கலைக்கழகம் கிடைத்தும் செல்ல முடியாமல் போன ரிஃப்னா: அதிபரின் உருக்கமான பதிவு

கெக்கிராவ முஸ்லீம் வித்தியாலயத்தின் 2025/2026 க.பொ.த உயர்தரப் பிரிவு மாணவர்கள் பல்கலைக்கழகங்களுக்குத் தெரிவாகியுள்ள மகிழ்ச்சியான செய்திகளுக்கிடையே, அனைவரையும் கலங்கவைக்கும் ஒரு சோகச் சம்பவமும் இடம்பெற்றுள்ளது. இது குறித்து பாடசாலையின் அதிபர் ஸுலைஹா பேகம் தனது முகநூலில் உருக்கமான பதிவொன்றைப் பகிர்ந்துள்ளார்.

குறித்த பாடசாலையைச் சேர்ந்த 10 மாணவர்கள் இம்முறை இலங்கையின் பல்வேறு அரச பல்கலைக்கழகங்களுக்குத் தெரிவாகி பாடசாலைக்குப் பெருமை சேர்த்துள்ளனர். இதில், கலைப்பிரிவில் பேராதனைப் பல்கலைக்கழகத்திற்குத் தெரிவாகியுள்ள மாணவி எம்.ஆர்.எப். ரிஃப்னா (M.R.F. Rifna) என்பவர், அந்தச் செய்தியைக் கேட்பதற்கு முன்பாகவே அகால மரணமடைந்துள்ளார்.

தனது மகளின் பல்கலைக்கழகத் தெரிவு குறித்து, ரிஃப்னாவின் தந்தை கண்ணீர் மல்கத் தன்னோடு பேசியதாக அதிபர் ஸுலைஹா பேகம் குறிப்பிட்டுள்ளார்.

"அவள் விரும்பியபடியே பேராதனை பல்கலைக்கழகம் அவளுக்கு வந்தும் இருக்கிறது, ஆனால் அவள்தான் இல்லை. முன் கூட்டி இறைவன் தன்னுடைய பெரிய பல்கலைக்கழகத்திற்கு அழைத்து விட்டான் எங்கள் பிள்ளையை," என அதிபர் மிகவும் வேதனையுடன் தனது முகநூல் பக்கத்தில் பதிவிட்டுள்ளார்.

தந்தையின் இந்த வார்த்தைகளும், அதிபரின் பதிவும் காண்போரை மிகுந்த சோகத்தில் ஆழ்த்தியுள்ளது.

பல்கலைக்கழகத்திற்குத் தெரிவாகியுள்ள 

மாணவர்களின் விபரங்கள்

கெக்கிராவ முஸ்லீம் வித்தியாலயத்திலிருந்து இம்முறை பல்கலைக்கழகங்களுக்குத் தெரிவாகியுள்ள மாணவர்களின் முழுமையான விபரம்:

மாணவரின் பெயர்	கற்கை நெறி	தெரிவாகியுள்ள பல்கலைக்கழகம்
செல்வி. M.R.F. ரிஃப்னா (காலஞ்சென்றவர்)	கலை (Arts)	பேராதனைப் பல்கலைக்கழகம்
R. மிஹாதா	கலை (Arts)	பேராதனைப் பல்கலைக்கழகம்
V. மதுஷா	கலை (Arts)	யாழ்ப்பாணப் பல்கலைக்கழகம்
T. கிருத்திகா	ஆங்கில மொழி மற்றும் பிரயோக மொழியியல்	ஊவா வெல்லஸ்ஸ பல்கலைக்கழகம்
செல்வி. R.F. ஷம்ஹா	இஸ்லாமிய கற்கைகள்	தென்கிழக்குப் பல்கலைக்கழகம்
M.N.M. நிப்ரான்	கலை (Arts)	தென்கிழக்குப் பல்கலைக்கழகம்
M.N.M. ஹம்ஸித்	முகாமைத்துவம் (Management)	திருகோணமலை வளாகம்
M.L.F. நுஸ்ரா	மொழிபெயர்ப்புக் கற்கைகள்	யாழ்ப்பாணப் பல்கலைக்கழகம்
K. அபீஷா	கலை (Arts)	தென்கிழக்குப் பல்கலைக்கழகம்
ஹலீமா	கலை (Arts)	யாழ்ப்பாணப் பல்கலைக்கழகம்

பல்கலைக்கழகம் தெரிவாகி பாடசாலைக்கும், சமூகத்திற்கும் பெருமை சேர்த்துள்ள ஏனைய மாணவர்களுக்குப் பலரும் தமது வாழ்த்துகளைத் தெரிவித்து வரும் அதேவேளை, மறைந்த மாணவி ரிஃப்னாவுக்காக ஆழ்ந்த இரங்கல்களையும் பிரார்த்தனைகளையும் பகிர்ந்து வருகின்றனர்.