பதுளை போதனா வைத்தியசாலை வைத்தியர்களின் பணிப்புறக்கணிப்பு தொடர்பான செய்தியின் விளக்கம்

பதுளை போதனா வைத்தியசாலையின் அரச மருத்துவ அதிகாரிகள் சங்க (GMOA) வைத்தியர்கள் பணிப்புறக்கணிப்பில் ஈடுபடாமல் கடமையில் ஈடுபட்டுள்ளதாக சமூக ஊடகங்களில் பரவி வரும் செய்தி குறித்து, அந்தச் சங்கத்தின் உதவிச் செயலாளர் வைத்தியர் பாலித ராஜபக்ஷ பின்வருமாறு விளக்கமளித்துள்ளார். 

அரசு மருத்துவ அதிகாரிகள் சங்கத்தினால் முன்னெடுக்கப்பட்டுள்ள நாடு தழுவிய பணிப்புறக்கணிப்பில் பங்கேற்காமல், பதுளை போதனா வைத்தியசாலையின் வெளிநோயாளர் பிரிவில் (OPD) கடமையாற்றும் அந்தச் சங்கத்தைச் சேர்ந்த இரண்டு வைத்தியர்கள் மாத்திரம் கடந்த (8) ஆம் திகதி பணியில் ஈடுபட்டுள்ளதாக அவர் தெரிவித்தார். 

பதுளை போதனா வைத்தியசாலையின் வெளிநோயாளர் பிரிவு வைத்தியர்கள் வழமை போன்று கடமையில் ஈடுபட்டுள்ளதாகக் கிடைத்த தகவலையடுத்து மேற்கொள்ளப்பட்ட வினவலுக்கு பதிலளிக்கும் போதே அவர் இதனைத் தெரிவித்தார். 

இது குறித்து மேலும் கருத்துத் தெரிவித்த வைத்தியர் பாலித ராஜபக்ஷ பதுளை போதனா வைத்தியசாலையின் சுமார் 400 வைத்தியர்கள் எமது சங்கத்தில் உறுப்பினர்களாக உள்ளனர். அவர்களில் வெளிநோயாளர் பிரிவில் பணியாற்றும் இரண்டு வைத்தியர்கள் மாத்திரமே இன்று வழமை போல் கடமையில் ஈடுபட்டுள்ளனர்.

அவர்களில் ஒருவர் பதுளையின் உள்ளூர் அரசியல்வாதி ஒருவரின் உறவினர் எனத் தெரியவந்துள்ளது. பணிப்புறக்கணிப்புக்கு ஆதரவளித்து சேவையிலிருந்து விலகியிருந்தால், தனது உறவினர் வகிக்கும் பதவியைக் கூட இழக்க நேரிடும் என்ற அச்சத்தினால் அவர் கடமைக்கு சமூகமளித்துள்ளார். எனினும், அந்த இருவரால் வெளிநோயாளர் பிரிவின் முழுமையான சேவையை வழங்க முடியாது என்றும் அவர் குறிப்பிட்டார். 

அந்த இரு வைத்தியர்களைத் தவிர, அவசர சிகிச்சைப் பிரிவு மற்றும் அறுவைச் சிகிச்சை கூடங்களில் ஏனைய வைத்தியர்கள் கடமையில் ஈடுபட்டுள்ளனர். பணிப்புறக்கணிப்பு இடம்பெற்றாலும், அப்பாவி நோயாளிகளை அனுமதிப்பது போன்ற அத்தியாவசிய பணிகளைப் புறக்கணித்து அவர்கள் உயிரிழப்பதைப் பார்த்துக் கொண்டிருப்பது தமது சங்கத்தின் நோக்கமல்ல என்றும் வைத்தியர் பாலித ராஜபக்ஷ மேலும் தெரிவித்தார்.